Baş Nazir Aparatının İnformasiya və ictimaiyyətlə əlaqələr şöbəsi Ermənistan və Azərbaycanın sərhədlərin demarkasiyası məsələləri üzrə komissiyalarının mayın 15-də yaydıqları bəyanatla bağlı “Armenpress”in suallarını cavablandırıb.
Məlumatda qeyd olunur: “Artıq bilirsiniz ki, əvvəlcədən razılaşdırılmış koordinatların yerləşdirilməsi üçün müvafiq işçi qrupları tərəfindən qeyd olunan ərazilərdə sərhəd dirəkləri quraşdırılıb. Həmin koordinatlar 1976-cı il xəritələrindən götürülüb. İndi kartoqraflar yenə eyni xəritələr əsasında dirəklər arasında sərhəd keçid xətlərini razılaşdırıblar. Yəni bu ərazilərdə sərhəd xəttinin bərpası başa çatıb, razılaşdırılıb, protokol imzalanıb və bu ərazilərdə sərhəd delimitasiyası başa çatıb”.
1976-cı il xəritələrinə gəlincə, qeyd olunub ki, “bu, əslində Sovet İttifaqının dağılması zamanı de-yure hüquqi əsası olan xəritədir. ER hökumətinin prinsipial yanaşması odur ki, Ermənistanla Azərbaycan arasında yeni sərhəd yaradılmır, bu, SSRİ-nin dağılması zamanı mövcud olan de-yure sərhəddir.
SSRİ-nin kartoqrafiya və geodeziya sahəsində səlahiyyətli orqanı 1979-cu ildə xəritənin düzgünlüyünü və hüquqi əsasını yoxlamışdır. Həmin xəritələr Sovet İttifaqı dağılana qədər istifadə olunub. Yəni onlar SSRİ-nin səlahiyyətli dövlət orqanları tərəfindən yoxlanılan ən son xəritələrdir”.
Kirants kəndində dirəklərin yerləşdirilməsi məsələsinə gəlincə, vurğulanıb ki, Kirantsın üç koordinatı kompüter vasitəsilə müəyyən edilib və dirəklər daha sonra quraşdırılacaq. Digərləri artıq quraşdırılıb. Kirants üçün sevindirici xəbər odur ki, son 33 ildə Kirants üçün əlçatmaz olan təxminən 25 hektar kənd təsərrüfatı sahəsi kəndə qaytarılacaq. Yəni sərhəd 1976-ci il xəritəsinə uyğun olacaq. Yollarların yer dəyişmə məsələləri də 2-3 ayda mümkün olacaq.
Məlumatda deyilir ki, Voskepar-Bağanis hissəsinin ən həssas məsələlərindən biri Voskeparın Astvatsatsin kilsəsi idi, digər məsələ isə Voskepar-Bağanis yolu idi. Hər iki məsələ ən yaxşı şəkildə həll olundu. Bu yol və kilsə tamamilə ER ərazisində qalıb və onlar sərhəd xəttindən olduqca uzaqdırlar. Berkaberdə hər hansı həssas məsələ olmayıb və indi də yoxdur.
Sərhədçilər məsələsinə gəlincə qeyd olunub ki, hər iki tərəfin sərhədçiləri yaxın 8-9 gün ərzində razılaşdırılmış Azərbaycan-Ermənistan sərhədinə yerləşdirəcəklər. Lakin Kirants kəndinin həssas hissəsində bu daha sonra olacaq.
Məlumatda xüsusilə vurğulanıb ki, delimitasiya edilmiş sərhədin olması ölkənin və ya hər hansı yaşayış məntəqəsinin təhlükəsizliyinə təhdid ola bilməz. Əksinə, belə bir sərhəd təhlükəni neytrallaşdırır. Alma-Ata bəyannaməsinə əsaslanan sərhədin bərpası güzəşt sayıla bilməz, çünki bizim beynəlxalq səviyyədə tanınmış sərhədimiz bərpa olunur. Sərhədin digər hissələrində də eyni məntiq və prinsiplərlə proses davam etdirilməlidir.
