Bu gün Avropa İttifaqı Ümumi Təhlükəsizlik və Müdafiə Siyasəti (CSDP) çərçivəsində Ermənistanda Aİ-nin Mülki Missiyasına (EUMA) başlayır.
Missiya Aİ Şurasının 23 yanvar 2023-cü il tarixli qərarı ilə rəsmi olaraq yaradılıb. Missiya Ermənistan-Azərbaycan sərhədinin Ermənistan tərəfində yerləşdirməklə Ermənistanın sərhəd rayonlarında sabitliyi təşviq etmək, münaqişədən təsirlənmiş bölgələrdə insanların inamını və təhlükəsizliyini gücləndirmək və Ermənistanla Azərbaycan arasında münasibətləri normallaşdırmaq üçün Aİ tərəfindən dəstəklənən səyləri asanlaşdıracaq şərait təmin etmək məqsədi daşıyır.
EUMA-nın 50-yə yaxın silahsız müşahidəçi də daxil olmaqla, təxminən 100 nəfərdən ibarət müstəsna mülki heyəti olacaq.
Missiyanın əməliyyat qərargahı Ermənistanın Vayots Dzor bölgəsinin Yeğegnadzor şəhərində olacaq. Aİ-nin mülki planlaşdırma və davranış qabiliyyəti üzrə icraçı direktoru Stefano Tomat mülki əməliyyatlar komandanı, Markus Riter isə missiya rəhbəri təyin edilib.
Xatırladaq ki, 2022-ci il dekabrın 27-də Ermənistan Respublikasının xarici işlər naziri ali nümayəndəyə ünvanladığı məktubda Aİ-ni Ermənistanda mülki missiyaya başlamağa dəvət etmişdi.
2023-cü il yanvarın 23-də Şura mandatı 2 il davam edəcək neytral və qeyri-icraçı missiyanın yaradılması barədə qərar qəbul edib.
