Küveyt Dövləti Ermənistan və Azərbaycanın müstəqilliyinə və suverenliyinə hörmət edilməsinin, eləcə də iki ölkə arasında sülh və təhlükəsizliyin təmin edilməsinin vacibliyini vurğulayır. Bu barədə Küveyt Dövlətinin Ermənistandakı səfiri Nauaf Abdulaziz Al Enezi “Lurer”in sorğusuna cavab olaraq bildirib.
“Daha qan tökülməsinin qarşısını almaq üçün atəşkəs rejiminin yaradılması istiqamətində hər cür səy göstərməyi, təmkinlik nümayiş etdirməyi və fikir ayrılıqlarını dialoq və danışıqlar yolu ilə həll etməyi zəruri hesab edirik”, - deyə səfir qeyd edib.
Onun fikrincə, dövlətlər arasında münasibətlər beynəlxalq səviyyədə tanınmış sərhədlərə və ərazi bütövlüyünə hörmət, qonşuluq, daxili işlərə qarışmama və münaqişələrin sülh yolu ilə həlli prinsiplərinə əsaslanmalıdır.
“Əsirlərlə bağlı məsələ ilk növbədə humanitar və mənəvi xarakter daşıyır və Küveyt Dövləti tərəfləri əsirləri dərhal azad etməyə çağırır. Belə böhranlı anlardan keçmiş bir dövlət olan Küveyt biganə qala bilməz və erməni xalqının bu dəqiqə yaşadığı ağrıları anlayır”, - deyə səfir yekunlaşdırıb.
