ER xarici işlər naziri Ararat Mirzoyan “Azatutyun” radiosuna müsahibə verib.
Sual: Azərbaycan prezidenti İlham Əliyev bəyan edib ki, onların sülh sazişi üzərində işə başlamaq təklifinə Ermənistan tərəfindən hələlik cavab gəlməyib. Bunu necə şərh edərdiniz?
Cavab: Həm açıq şəkildə, həm beynəlxalq formatda, həm Azərbaycan tərəfi ilə birbaşa təmaslar zamanı Ermənistan tərəfi dəfələrlə ən yüksək səviyyədə bəyan edib ki, biz sülhün bərqərar olunması gündəmimizdə ardıcılıq və gələcək sülh sazişinə dair Azərbaycanın təkliflərində heç nəyi qəbuledilməz hesab etmirik, təbii ki, bu təklifləri öz ideyalarımızla tamamlayırıq.
Biz ATƏT-in Minsk Qrupunun həmsədrləri vasitəsilə hərtərəfli sülh gündəliyi ilə bağlı təklifimizi Azərbaycana çatdırmışıq, lakin indiyədək heç bir rəsmi cavab eşitməmişik. Yəni Azərbaycan prezidentinin bəyanatlarının əksinə olaraq Ermənistan sülh danışıqları təklifini nəinki rədd etməyib, hətta müsbət cavab verib və Azərbaycanın cavabını gözləyir. Eyni zamanda, biz Azərbaycana sülh sazişi ilə bağlı xarici işlər nazirləri arasında məsləhətləşmələrə başlamağı təklif etmişik, lakin hələ ki, cavab almamışıq. Ermənistan Respublikası bir gün əvvəl sülh sazişi üzrə məsləhətləşmələrə başlamağa hazır olduğunu təsdiqləyir.
Sual: Azərbaycan prezidenti həm də qeyd edib ki, bir il sonra da 9 noyabr 2020-ci il tarixli bəyanat, xüsusən də regional nəqliyyat kommunikasiyalarının blokdan çıxarılması məsələsi tam yerinə yetirilməyib. Bununla bağlı nə deyə bilərsiniz?
Cavab: Bəli, 9 noyabr üçtərəfli bəyanatı hələ də tam yerinə yetirilməyib. Azərbaycan təkcə üçtərəfli bəyanatla üzərinə götürdüyü öhdəlikləri deyil, həm də beynəlxalq humanitar hüququ pozaraq erməni hərbi əsirləri, mülki şəxsləri qanunsuz olaraq həbs etməkdə, onlardan girov, sövdələşmə və insan alverin subyekti kimi istifadə etməkdə davam edir. Bu tələbi Azərbaycana təkcə Ermənistan deyil, bütün sivil dünya təqdim edir.
Üstəlik, Azərbaycan faktiki olaraq üçtərəfli bəyanatın əsas məsələlərindən birini inkar edir, deyir ki, Dağlıq Qarabağ yoxdur, Dağlıq Qarabağ problemi yoxdur. Bu arada Azərbaycan prezidenti üçtərəfli bəyanatında Dağlıq Qarabağ subyektinin mövcudluğunu öz imzası ilə təsdiqləyib. Və nə qədər ki, üçtərəfli bəyanat var, o subyektin varlığını inkar etmək olmaz.
9 noyabr tarixli üçtərəfli bəyanatın kobud şəkildə pozulması odur ki, Azərbaycan silahlı qüvvələri, 2020-ci il tarixli bu bəyanatın birinci məqamını pozaraq, cari ilin martın 24-də Dağlıq Qarabağda Rusiya sülhməramlı kontingentinin cavabdehlik zonasına girib və indi də orada qalırlar.
Regional nəqliyyat kommunikasiyalarının açılmasına gəlincə, biz dəfələrlə bildirmişik ki, Ermənistanın özü bu prosesin uğurunda böyük maraqlıdır.
Həqiqətə və bir sıra beynəlxalq tərəfdaşların iştirakı ilə əldə edilmiş razılaşmalara heç bir aidiyyatı olmayan Azərbaycan hakimiyyətinin eksteritorial dəhlizlə bağlı davamlı əsassız bəyanatları olmasaydı, proses daha tez başa çatardı. Ədalət naminə qeyd edək ki, blokun açılması ilə bağlı müzakirə əslində konstruktiv ab-havada gedir, ümid edirəm ki, anlaşılmaz siyasi intriqalar ucbatından iflasa uğramayacaq, tezliklə uğurla başa çatacaq.
