Bolqarıstanda rəsmi səfərdə olan Ermənistan Respublikasının xarici işlər naziri Ararat Mirzoyan iyunun 14-də Bolqarıstan Respublikasının prezidenti Rumen Radyev ilə görüşüb.
Ararat Mirzoyan və Rumen Radyev Ermənistan-Bolqarıstan əlaqələrinin inkişaf perspektivlərinə toxunaraq, iki ölkə arasında siyasi dialoqu, ticarət-iqtisadi, nəqliyyat, turizm və təhsil sahələrində əməkdaşlığı dərinləşdirməyə qarşılıqlı hazır olduqlarını bildiriblər.
Bolqarıstandakı erməni icmasının iki ölkəni birləşdirən möhkəm körpü rolu da vurğulanıb.
Həmsöhbətlər “Fars körfəzi-Qara dənizi” nəqliyyat dəhlizinin yaradılması istiqamətində intensiv iş aparmağı vacib sayıblar.
Görüş zamanı regional və beynəlxalq təhlükəsizlik məsələlərinə də toxunulub.
Nazir Mirzoyan Bolqarıstan prezidentinə Cənubi Qafqaz regionundakı vəziyyət, xüsusən də Ermənistan ilə Azərbaycan arasında münasibətlər və Dağlıq Qarabağ münaqişəsinin həlli ilə bağlı prosesə dair son inkişafları təqdim edib.
Hər iki tərəf Dağlıq Qarabağ münaqişəsinin yalnız sülh danışıqları yolu ilə həll edilməli olduğunu vurğulayıb. Bununla bağlı nazir Mirzoyan Dağlıq Qarabağ münaqişəsinin həllində ATƏT-in Minsk Qrupu həmsədrlərinin rolunu vurğulayaraq, münaqişənin həlli ilə bağlı Bolqarıstanın ATƏT-in Minsk Qrupunun həmsədrləri çərçivəsində tutduğu mövqeni yüksək qiymətləndirib.
Digər təcili humanitar məsələlərlə yanaşı, erməni hərbi əsirlərin və digər saxlanılan şəxslərin vətənə qaytarılmasının və Artsaxda erməni dini, tarixi və mədəni abidələrinin qorunub saxlanılmasının zəruriliyi vurğulanıb.
Ermənistanın xarici işlər naziri Bolqarıstan prezidentinə Ermənistan-Türkiyə normallaşması prosesi barədə də məlumat verib.
