"Tələbə Gücü Mərkəzi" təşkilatı cümə axşamı Azərbaycanın Təhsil Nazirliyi qarşısında etiraz aksiyası təşkil edib.
Gənclər Təhsil Nazirliyini fəaliyyətsizlikdə ittiham ediblər və üzərində "Çayxana deyilsiniz, fəaliyyət göstərin!" yazılan plakat açıblar. Bu barədə "Turan" agentliyi məlumat yayıb.
Tələbələr təhsil sahəsindəki problemlərin həll edilməsini və nöqsanların aradan qaldırılmasını tələb ediblər. Onlar həmçinin ali məktəblərdə mövcud olan "despotiyaya", tələbələrin müraciətlərinə məhəl qoyulmamasına etiraz ediblər.
Aksiya iştirakçılarının bəyanatında deyilir: "Dövlət universitetlərində pulsuz təhsil təmin olunsun, eyni zamanda təhsilin keyfiyyəti artırılsın, tələbələrin problemləri həll edilsin, tələbələrin iqtisadi problemləri nəzərə alınaraq yaşam təqaüdü tətbiq edilsin, eyni zamanda yataqxana problemi həll edilsin, universitetlərdə bullinq və diskriminasiya halları şəffaf şəkildə araşdırılsın, tələbələrin siyasi baxışlarına, fərqli mövqeyinə, dininə, cinsinə və orientasiyasına görə ayrı-seçkiliyə son qoyulsun".
Aksiya iştirakçıları bildiriblər ki, bu məsələlərlə bağlı Təhsil Nazirliyinə dəfələrlə müraciət etmələrinə baxmayaraq, heç bir tədbir görülməyib.