Mayın 2-də Vaşinqtonda Ermənistanın xarici işlər naziri Ararat Mirzoyan ABŞ dövlət katibi Entoni Blinkenlə görüşüb.
Görüş zamanı Entoni Blinken ABŞ-ın ATƏT-in Minsk Qrupunun həmsədri kimi davamlı sülh və firavanlığa nail olmaqda Ermənistan və Azərbaycana kömək etmək öhdəliyini vurğulayıb.
Dövlət katibi ortaq demokratik dəyərlərə uyğun olaraq ikitərəfli münasibətləri daha da gücləndirməyə və Ermənistanın islahatlar gündəliyi üzrə əməkdaşlığı davam etdirməyə sadiq olduğunu bildirib.
Blinken və Mirzoyan nüvə sahəsində əməkdaşlığa dair Anlaşma Memorandumu imzalayıblar ki, bu da Ermənistanın enerji təchizatını şaxələndirməyə çalışdığı bir vaxtda mülki nüvə əməkdaşlığının artırılmasına yol açır.
“Mən baş nazir və onun hökumətini apardıqları demokratik islahatlara, irəliləyişlərə görə salamlayıram və Ermənistanla Azərbaycan arasında dialoqu da alqışlayıram. Baş nazir və Ermənistanın bu prosesdə göstərdiyi uzaqgörənliyə, cəsarətə və çevikliyə, davamlı sülhə can atdıqlarına görə səmimi təşəkkürümü bildirirəm”, - Blinken deyib.
Ararat Mirzoyan öz növbəsində Ermənistanın regional sülh və sabitliklə bağlı mövqeyini təqdim edib. Azərbaycanın Dağlıq Qarabağa qarşı başlatdığı 44 günlük müharibənin qaldırdığı humanitar məsələlər kontekstində erməni hərbi əsirlərin, girovların və digər məhbusların vətənə qaytarılması, Azərbaycanın işğal olunmuş ərazilərində erməni mədəni və dini irsinin qorunub saxlanılması zərurətini qeyd edib.
“Amerika Birləşmiş Ştatlarının ATƏT-in Minsk Qrupunun həmsədri kimi Dağlıq Qarabağ münaqişəsinin sülh yolu ilə həllinə kömək etmək üçün oynadığı mühüm rolu vurğulamaq istərdim.
Mən həmçinin Ermənistan-Türkiyə münasibətlərinin normallaşdırılması prosesində ABŞ-ın dəstəyini və Erməni soyqırımını pisləyərək bu il də mövqeyini təsdiqləməsini qeyd edirəm”.
Dövlət katibi Blinken qeyd edib ki, ABŞ Ermənistanla Türkiyə arasında münasibətlərin normallaşmasına tam dəstək verir və Ermənistanın bu prosesdə konstruktiv səylərini dəstəkləyir.
Tərəflər həmçinin Ermənistanın demokratik, hüquqi və antikorrupsiya islahatlarının həyata keçirilməsində irəliləyişini müzakirə ediblər.
