Sentyabrın 7-də Yerevanda Ermənistan Respublikası xarici işlər və beynəlxalq ticarət nazirin müavini Mnatsakan Safaryan və Özbəkistan xarici işlər nazirinin müavini Bobur Usmanovun rəhbərliyi ilə Ermənistan Respublikası və Özbəkistan Respublikası xarici işlər nazirlikləri arasında siyasi məsləhətləşmələr keçirilib.
XİN-dən verilən məlumata görə, həmsöhbətlər ikitərəfli gündəlikdəki və çoxtərəfli əməkdaşlığın geniş məsələlərini, o cümlədən ən yüksək və yüksək səviyyələrdə siyasi dialoqu müzakirə ediblər, ikitərəfli münasibətlərin daha da inkişaf etdirilməsinin və müxtəlif sahələrdə əməkdaşlığın genişləndirilməsinin vacibliyini vurğulayıblar.
Mnatsakan Safaryan və Bobur Usmanov ticarət-iqtisadi əlaqələrin dərinləşdirilməsi, investisiyaların təşviqi, yüksək texnologiyalar, təhsil və turizm sahələrində əməkdaşlığın perspektivlərinə xüsusi diqqət yetiriblər. İşgüzar dairələr arasında tərəfdaşlığın təşviqi və aktiv dialoqun saxlanılması vacib addım hesab edilib. Bu baxımdan, həmsöhbətlər Yerevan və Daşkənd arasında birbaşa hava əlaqəsinin bərpasını alqışlayıblar və əlaqə sahəsində əməkdaşlığın dərinləşdirilməsini təmin etmək üçün işləri gücləndirmək barədə razılığa gəliblər.
Ermənistan və Özbəkistan nazir müavinləri müxtəlif sahələrdə əməkdaşlıq potensialını reallaşdırmaq üçün ikitərəfli münasibətlərdə hüquqi və müqavilə bazalarının genişləndirilməsinin vacibliyini vurğulayıblar.
Ermənistan və Özbəkistanda keçirilən beynəlxalq tədbirlərdə qarşılıqlı iştirak, eləcə də beynəlxalq təşkilatlarda əməkdaşlıq məsələləri müzakirə edilib.
