6 may tarixində “Yerevan Dialoqu” beynəlxalq konfransı çərçivəsində Ermənistan xarici işlər nazirinin müavini Mnatsakan Safaryan və Qazaxıstan xarici işlər nazirinin müavini Yermuxambet Konuspayev arasında görüş keçirilib. Bu barədə ER XİN məlumat yayıb.
Həmsöhbətlər bu il yüksək və ən yüksək səviyyələrdə rəsmi səfərlər zamanı əldə edilən razılaşmaların effektiv şəkildə həyata keçirilməsinə önəm veriblər və bu istiqamətdə davamlı səylərin zəruriliyini vurğulayıblar.
Görüş zamanı Ermənistan-Qazaxıstan ikitərəfli münasibətlərinin gündəm məsələləri, o cümlədən qarşıdan gələn tədbirlərin və qarşılıqlı səfərlərin proqramları, eləcə də ikitərəfli və çoxtərəfli platformalarda əməkdaşlıq ətraflı müzakirə edilib. Həmsöhbətlər həmçinin Ermənistan və Qazaxıstan arasında birbaşa müntəzəm uçuşların bərpasını ikitərəfli əlaqələrin təşviqində mühüm amil kimi yüksək qiymətləndiriblər.
Ermənistan və Qazaxıstan arasında münasibətlərin daha da inkişaf etdirilməsi və möhkəmləndirilməsi məqsədi daşıyan xarici işlər nazirlikləri arasında sıx əlaqələrin və əməkdaşlığın davam etdirilməsi və dərinləşdirilməsi barədə razılığa gəlinib.
