Livan Baş naziri Nəvaf Salam Səudiyyə Ərəbistanının Əl-Hədəs televiziya kanalına verdiyi müsahibədə bildirib ki, şiə radikal Hizbullah hərəkatı İsrailə qarşı müharibə zamanı İranın İslam İnqilabı Keşikçiləri Korpusunun (SEPAH) komandanlığı altındadır. “SEPAH buradadır və təəssüf ki, Livandakı hərbi əməliyyata rəhbərlik edir. Bu insanların saxta pasportları var və ölkəyə qanunsuz daxil olublar”, - deyə Salam vurğulayıb.
Livan Baş naziri həmçinin martın əvvəlində Kiprin Akrotiri şəhərindəki Britaniya hərbi bazasına İranın pilotsuz təyyarəsi ilə hücumuna görə SEPAH-ı günahlandırıb və bunu Korpusun həyata keçirdiyini iddia edib. Aİ üzvü olan adanın hakimiyyət orqanları daha əvvəl cihazın Hizbullah tərəfindən Livandan buraxıldığını iddia etmişdi.
Salam yenidən şiə qrupunu İsrailə raket zərbələri endirməklə Livanı İranla müharibəyə sürükləməkdə ittiham edib.
Livan hökuməti 2 martda İslam İnqilabı Keşikçiləri Korpusunun ölkədəki bütün fəaliyyətlərini qadağan edib. Bundan əlavə, Beyrut Hizbullah üzvlərini könüllü olaraq silahlarını dövlətə təhvil verməyə çağırıb.
