İsveçrədə nüvə sazişi ilə bağlı Tehran-Vaşinqton görüşü keçirildi. İran xarici işlər nazirinin sözlərinə görə, bu danışıqlar raundu ən ciddi və ən uzun, 6 saat davam edən raund idi.
“Əlaqələr dolayı yolla, Oman xarici işlər nazirinin, eləcə də Beynəlxalq Atom Enerjisi Agentliyinin baş direktorunun vasitəçiliyi ilə baş tutdu. Rafael Qrossinin iştirakı texniki baxımdan faydalı oldu. Bu uzun və gərgin saatlarda yaxşı irəliləyiş əldə etdik”, - deyə Abbas Əraqçi ətraflı məlumat verdi.
Onun sözlərinə görə, onlar həm nüvə proqramı, həm də İran əleyhinə sanksiyaların ləğvi ilə bağlı mümkün razılaşmanın komponentlərinə ciddi yanaşıblar.
“Bəzi məsələlərdə artıq qarşılıqlı anlaşma əldə edilib, təbii ki, fikir ayrılıqları var. Lakin hər iki tərəf danışıqlar yolu ilə həll yolu tapmaq üçün daha böyük qətiyyət nümayiş etdirib”, - deyə iranlı diplomat əlavə edib.
Əraqçi bildirib ki, 2 martda Tehran və Vaşinqtondan olan texniki qruplar Vyanada Beynəlxalq Atom Enerjisi Agentliyinin mütəxəssisləri ilə görüşəcəklər. Tərəflər danışıqları davam etdirmək barədə razılığa gəliblər.
