Avropa Birliyi xarici qaz təchizatçılarını ixrac etdikləri yanacağın Rusiya mənşəli olmadığını təsdiqləməyə məcbur edib. Sənəd Türkiyə və Azərbaycandan olan ixracatçılara şamil edilir. Onlar Bolqarıstan sərhədindəki kompressor stansiyalarından biri olan Strandja-1/Malkochlar vasitəsilə qazın Rusiya mənşəli olmadığına dair sübut təqdim etməlidirlər. Yaxınlıqda əvvəllər Şərqi və Mərkəzi Avropa ölkələrinə Rusiya qazı verən TürkAxını qaz kəmərinin dəniz hissəsinin qurudakı davamı olan Strandja-2/Malkochlar stansiyası yerləşir.
Aİ Şurası qeyd edib ki, bu yaxınlara qədər bu marşrutlar vasitəsilə xeyli miqdarda Rusiya yanacağı qəbul edilib ki, bu da alyansın Rusiyadan enerji ehtiyatlarından tədricən imtina etmək strategiyasına ziddir.
Qərar qazın mənşə ölkəsinin Rusiya olmadığına dair birmənalı dəlillər tələb edir.
1 mart tarixinə qədər üzv dövlətlər qaz təchizatçılarını dəyişdirmək üçün milli planlar hazırlamalı və Rusiya idxalından imtina ilə bağlı mümkün çətinlikləri qeyd etməlidirlər.
Aİ rəhbərliyi vurğulayıb ki, mayeləşdirilmiş təbii qaz və neft də daxil olmaqla, Rusiya enerji ehtiyatlarının idxalının saxlanılması regionun enerji təhlükəsizliyinə mənfi təsir göstərə bilər.
