Gürcüstanın Baş naziri İrakli Kobaxidze İmedi TV-də Azərbaycanla Ermənistan arasında münasibətlərin bərpasını və ticarət-iqtisadi əlaqələrin inkişafını alqışladığını bildirib. Eyni zamanda, o, Gürcüstanın alternativ dəhliz vasitəsilə tranzit funksiyasını itirə biləcəyi ilə bağlı fərziyyələri də rədd edib.
"Gürcüstanın tranzit rolunu gücləndirmək üçün əhəmiyyətli investisiyalar qoyulur. Alternativ dəhliz Gürcüstan üçün təhlükə yaratmır", - deyə Kobaxidze bildirib və bunu Orta Dəhliz vasitəsilə yük daşınmasının son beş ildə yeddi dəfə artdığını qeyd edərək təsdiqləyib.
"Bizim yeganə vəzifəmiz artan yük daşımalarının həcmini təmin etmək üçün infrastrukturdan maksimum dərəcədə istifadə etməkdir. Belə bir artım şəraitində alternativ dəhliz yalnız tranzit funksiyamızı tamamlayacaq", - deyə Gürcüstanın Baş naziri bildirib və əlavə edib ki, gələcəkdə ölkənin tranzit rolunun inkişafına mümkün qədər çox pul yönəldiləcək.
