Azərbaycan Xalq Cəbhəsi Partiyası (AXCP) noyabrın 30-da bəyanat yayaraq son həbsləri “ailə hakimiyyətinin milli-demokratik qüvvələrə qarşı başladığı yeni genişmiqyaslı repressiya kampaniyasını” adlandırıb. Bəyanatda deyilir ki, baş verənlər siyasi sifarişlidir.
“AXCP sədri Əli Kərimli ilə yanaşı, Demokratik Qüvvələrin Milli Şurasının sədri Cəmil Həsənlinin, MŞ koordinasiya Mərkəzinin üzvü Gültəkin Hacıbəylinin və ayrı-ayrı cəbhə funksionerlərinin qondarma cinayət işinə cəlb edilməsi və onlara qarşı irəli sürülən saxta ittihamlar sırf siyasi sifariş xarakteri daşıyır”, – bəyanatda qeyd olunur.
Partiya həmçinin dövlət çevrilişi ilə bağlı ittihamlari rədd etdiyini vurğulayır:
“Bu gün Rusiyanın adamı elan edilən Ramiz Mehdiyevi öz hakimiyyətinin ikinci şəxsi kimi uzun illər vəzifədə saxlayan, onun əli ilə hakimiyyətə gələn və bu günə qədər onu dəfələrlə mükafatlandıran İlham Əliyevdir. Ramiz Mehdiyev İlham Əliyevin kadrıdır və hər zaman da onun iradəsini yerinə yetirib, vəzifədən gedəndən sonra da korrupsiya yolu ilə topladığı var-dövlətlə və dövlət adından törətdiyi cinayətlərlə İlham Əliyev hakimiyyətinə bağlı olub”.
AXCP sədri Əli Kərimli və partiyanın Rəyasət Heyətinin üzvü Məmməd İbrahim noyabrın 29-da saxlanılaraq, DTX-da Prezident Administrasiyasının keçmiş rəhbəri Ramiz Mehdiyevlə bağlı aparılan istintaq işi çərçivəsində dindirilib və onların evlərində axtarış aparılıb. Həmin gün AXCP fəalları Faiq Əmirli və Ruslan Əmirli də DTX-ya aparılıb, lakin daha sonra sərbəst buraxılıblar.
Partiyanın Sabunçu rayon təşkilatının sədri Fariz Əlizadədən isə noyabrın 28-dən bəri xəbər yoxdur.
2019-cu ildə AXCP sədri Əli Kərimliyə maddi yardım göstərməkdə ittiham edilərək 7 il 3 ay müddətinə azadlıqdan məhrum olunan, daha sonra azadlığa buraxılan Saleh Rüstəmov da DTX əməkdaşları tərəfindən saxlanılıb və noyabrın 30-da sərbəst buraxılıb.
Milli Şuranın üzvü Gültəkin Hacıbəyli noyabrın 30-na keçən gecə İstanbulda kirayədə yaşadığı evdə Türkiyənin hüquq-mühafizə orqanları tərəfindən saxlanılıb.
Milli Şuranın sədri, tarixçi Cəmil Həsənlinin isə Azərbaycandan çıxışına qadağa qoyulub və o, şahid qismində DTX-ya çağırılıb.
