Bu səfərə gətirib çıxaran proses 2022-ci ildə Praqa görüşü ilə başlayıb.Bu barədə Ermənistanın baş naziri Nikol Paşinyan İstanbulda yerli erməni icmasının nümayəndələri ilə görüşündə bildirib.
Onun sözlərinə görə, təəssüf ki, regionumuz kifayət qədər gərgin olaraq qalır və belə səfərlərin və təmasların əsas məqsədlərindən biri regionun daha sabit, daha dinc və təhlükəsiz olması üçün nə edə biləcəyimizi müzakirə etməkdir.
"Əlbəttə, bu, bu kontekstdə təmasların ən mühüm gündəliyidir. Söhbət münasibətlərin normallaşmasından, diplomatik münasibətlərin qurulmasından, nəqliyyat infrastrukturunun mümkün bərpasından, siyasi dialoqdan gedir və bütün bunlar son nəticədə təhlükəsizliyi təmin edən amillərdir", - baş nazir qeyd edib.
Onun sözlərinə görə, bir sıra regional məsələlərdə Ermənistan və Türkiyənin mövqeləri kifayət qədər yaxındır.
“Bu, tez-tez baş vermirdi, amma indi nəzərə çarpır ki, bir sıra məsələlərdə kifayət qədər oxşar təsəvvürlərimiz var. Biz beynəlxalq gündəmdəki məsələlərdən danışırıq. Bu isə münasibətlərin ab-havasına və əhval-ruhiyyəsinə müəyyən təsir göstərən amildir”, - deyə Paşinyan qeyd edib və İranda baş verən hadisələrin çox narahatlıq doğurduğunu vurğulayıb.
