KTMT Hərbi Komitəsinin 21-ci sessiyası videoformatda keçirilib. İclasda Ermənistan, Belarus, Qazaxıstan, Qırğızıstan, Rusiya və Tacikistan silahlı qüvvələrinin baş qərargah rəisləri, KTMT-nin Birləşmiş Qərargahının rəhbəri Anatoli Sidorov və qurumun baş katibinin müavini Tahir Xayruloyev iştirak ediblər. KTMT-nin mətbuat xidmətinin məlumatına görə, tərəflər KTMT-nin məsuliyyət zonasında hərbi təhlükəsizliyə qarşı çağırışları və onlara qarşı mübarizə üsullarını müzakirə ediblər.
“Sidorov qurumun sülhməramlı potensialının inkişafı, o cümlədən BMT-nin sülhməramlı fəaliyyətinə qoşulma istiqamətində görülən işlər barədə hesabat təqdim edib”, - deyə məlumatda qeyd edilib.
Müzakirənin nəticələrinə görə, KTMT-nin birgə qərargahına KTMT üzvlərinin müdafiə qurumları ilə birgə KTMT-nin kollektiv sülhməramlı qüvvələrinin formalaşdırılması, hazırlanması və əlaqələndirilməsi ilə məşğul ola biləcək təlim bazaları və təlim mərkəzlərinin siyahısını formalaşdırmaq tapşırılıb.
KTMT-yə üzv dövlətlərin dövlət hərbi aviasiyasının beynəlxalq uçuşlarının təşkilinin təkmilləşdirilməsi perspektivləri də nəzərdən keçirilib.
Hərbi komitənin növbəti iclasının 2023-cü ilin birinci yarısında Belarusda keçirilməsi gözlənilir.
