Syunikdə Ermənistan və İranın aparıcı analitik mərkəzlərinin nümayəndələri və ekspertlərinin iştirakı ilə Ermənistan-İran konfransı başladı. Bu barədə Ermənistan Respublikasının Syunik qubernatorunun aparatı məlumat verib.
Syunik qubernatoru Robert Qukasyan tədbirin rəsmi açılışında iştirak edib və salamlama nitqi söyləyib. Qubernator çıxışında Ermənistan-İran dostluq münasibətlərini və onların Ermənistan, xüsusən də Syunik üçün əhəmiyyətini yüksək qiymətləndirib. O, görüş iştirakçılarını salamlayıb və müzakirələrin səmərəli və uğurlu olmasını arzulayıb.
İran İslam Respublikasının Ermənistandakı fövqəladə və səlahiyyətli səfiri Xəlil Şirğolami də iştirakçıları salamlayıb və iştiraklarına görə onlara təşəkkür edib. O, ekspert qruplarının gördüyü işlərin dost ölkələr arasında əməkdaşlığı daha da inkişaf etdirə biləcəyinə əminliyini bildirib.
Konfransın məqsədi Yerevan və Tehranın yanaşmalarının uyğunlaşdırılmasına töhfə vermək, iki ölkə arasında əməkdaşlığın yeni istiqamətlərini müəyyən etmək, eləcə də qərar qəbuletmə orqanları üçün praktik tövsiyələr hazırlamaqdır.
Seminar zamanı ekspert müzakirələri siyasi, iqtisadi, regional inkişaf və digər məsələləri əhatə edəcək.
Konfransın nəticəsi olaraq, Ermənistan-İran ekspert institusional əməkdaşlığı üçün təkliflər hazırlamaq və əlavə proqramlar formalaşdırmaq planlaşdırılır.
