18 martda Məskatda ER xarici işlər naziri Ararat Mirzoyan Oman Sultanlığının kənd təsərrüfatı, balıqçılıq və su ehtiyatları naziri Səud bin Hamud əl-Həbsi ilə görüşüb. Bu barədə ER Xarici İşlər Nazirliyi məlumat verib.
Həmsöhbətlər sektor əməkdaşlığının inkişafı və həm idxal, həm də ixrac istiqamətlərində ticarətin təşviqi imkanlarını müzakirə ediblər.
Hər iki tərəf qarşılıqlı maraqları və ticarət dövriyyəsinin genişləndirilməsi baxımından ən böyük potensiala malik istiqamətləri təqdim ediblər.
İqtisadi inkişafa və əlverişli investisiya şəraitinə toxunan nazir Mirzoyan vurğulayıb ki, Ermənistan və Azərbaycan arasında bərqərar olan sülh regional əlaqələrin inkişafı üçün yeni imkanlar açır.
Ararat Mirzoyan və Səud bin Hamud əl-Həbsi birgə təşəbbüslərin həyata keçirilməsini və konkret sahələrdə qarşılıqlı faydalı əməkdaşlığı təmin etmək üçün sektor departamentləri və qurumları, eləcə də işgüzar dairələr arasında birbaşa əlaqələrin təşviqi barədə razılığa gəliblər.
