ER xarici işlər naziri Ararat Mirzoyan Avropa Şurasının Avropa İnsan Hüquqları Məhkəməsinin sədri Matias Gilyumar ilə görüşüb. Bu barədə ER Xarici İşlər Nazirliyi məlumat verib.
Həmsöhbətlər Ermənistanla AİHM arasında əməkdaşlıq, qanunun aliliyinin təmin edilməsi və müstəqil ədalətin təşviqi ilə bağlı fikir mübadiləsi aparıblar. Hər iki tərəf Məhkəmə ilə müxtəlif səviyyələrdə fəal əməkdaşlığı məmnuniyyətlə qeyd ediblər.
Ararat Mirzoyan və Matias Gilyumar AİHM qərarlarının icrası məsələsinə toxunublar. Nazir Mirzoyan Ermənistanın qərarların icrası və nəzarətin dayandırılmasında yüksək göstəricilərini qeyd edib, Ermənistanın demokratik prinsiplər və insan hüquqlarının qorunması sahələrində davamlı islahatlarda qətiyyətini vurğulayıb.
"Ermənistan Məhkəmənin, ilk növbədə onun fəaliyyətinin əsasını təşkil edən prinsiplərin və dəyərlərin yanındadır və Ermənistan Respublikası vətəndaşlarının rifahı naminə demokratik gündəmin təşviqində AİHM ilə əməkdaşlığa böyük dəyər verir", - deyə nazir Mirzoyan vurğulayıb.
