BMT Təhlükəsizlik Şurası ABŞ-ın Qəzzaya dair sülh planını dəstəkləyən qətnamə qəbul edib. Sənəd Qəzzada təhlükəsizliyi təmin edəcək beynəlxalq sabitləşdirici qüvvələrin yaradılmasını tələb edir. Təşəbbüsdə hansı ölkələrin iştirak edəcəyi açıqlanmır.
Təhlükəsizlik Şurasının üzvləri də ABŞ prezidentinin nəzarəti altında keçid administrasiyasının yaradılması ideyasını alqışlayıblar. Əslində, bu qətnamə ABŞ prezidentinin Qəzzada sülhlə bağlı 20 bəndlik planının ikinci mərhələsinin başlanmasından xəbər verir.
BMT Təhlükəsizlik Şurasının 15 üzvündən 13-ü qətnamənin lehinə səs verib. Rusiya və Çin bitərəf qalıb.
Moskvanın BMT-dəki daimi nümayəndəliyi qətnaməni qeyri-müəyyən adlandırıb. "Əsas odur ki, bu sənəd işğal olunmuş Fələstin ərazilərində ABŞ və İsrailin nəzarətsiz sınaqları üçün pərdəyə çevrilməsin", - Rusiya tərəfinin bəyanatında deyilir.
Həmas Təhlükəsizlik Şurasının qətnaməsini tənqid edərək, onun Fələstin xalqının hüquq və tələblərinə hörmət etmədiyini iddia edib.
