Biz Ermənistanla Azərbaycan arasında yaradılmış sülhdən danışarkən başa düşməliyik ki, əsas prinsiplər razılaşdırılıb, məsələn, qarşılıqlı asılılıqdan söhbət gedirsə, başa düşməliyik ki, sülh müqaviləsi paraflanıb, lakin bütün bunlara baxmayaraq, hələ də həll edilməli olan məsələlər var. Bunu Ermənistan Respublikasının xarici işlər naziri Ararat Mirzoyan “Orbeli Forumu: Sülh və çoxtərəfli əməkdaşlığın qurulması” adlı beynəlxalq konfransda deyib.
Mirzoyan misal olaraq iki ölkənin cəmiyyətləri və vətəndaşları arasındakı əlaqələri göstərib.
“Biz də qəbul etməliyik və bu barədə demək lazımdır ki, bu barışıq vaxt aparacaq, bu barışığa ehtiyac var, amma cəmiyyətlərin tam barışmasının olmaması da obyektivdir, bu həm də cəmiyyətlərin keçirdiyi dərin psixoloji travma, hələ çox təzə olan yaralarla şərtlənir, bunun aradan qaldırılması problemi var.
Və bu baxımdan vətəndaşlar arasında əlaqələr, o cümlədən vətəndaş cəmiyyətləri arasında əlaqələr və təmaslar çox vacibdir. Biz buna böyük diqqət yetiririk və Azərbaycan da bunu belə qəbul edir”, - deyə Ararat Mirzoyan bildirib.
Nazir xatırladıb ki, bir neçə həftə əvvəl Ermənistanda vətəndaş cəmiyyəti nümayəndələri arasında görüşlər keçirilib.
“Mən bildiyimə görə, bu auditoriyada Azərbaycandan ekspertlər və ya jurnalistlər var, Azərbaycanda belə tədbirlər keçirilməlidir, Ermənistandan nümayəndələr olmalıdır.
Cəmiyyətlər arasında da bu dialoqu inkişaf etdirməyin yeganə yolu budur”, - deyən Mirzoyan bunun asan deyil, ağrılı proses olduğunu vurğulayıb.
