Pekində, Böyük Xalq Zalında Ermənistan Respublikasının baş naziri Nikol Paşinyan Çin Xalq Respublikasının vitse-prezidenti Han Çen ilə görüşüb. Bu barədə hökumətin mətbuat xidməti məlumat yayıb.
Han Çen baş nazir Paşinyanın ÇXR-ə səfərini və ŞƏT sammitində və Pekində keçirilən paradda iştirakını alqışlayıb. O qeyd edib ki, Ermənistan Respublikasının Baş naziri ilə ÇXR sədri Si Cinpin arasında məhsuldar görüşün nəticəsi Ermənistan və Çin arasında bütün sahələrdə əməkdaşlığın inkişafına və genişlənməsinə töhfə verəcək strateji tərəfdaşlığın yaradılmasıdır.
Han Çen çıxışında qeyd edib ki, Çin Ermənistanla strateji tərəfdaşlıq münasibətlərinin qurulmasına böyük önəm verir və bu baxımdan baş nazirin səfəri əsas əhəmiyyət kəsb edir.
Baş nazir Paşinyan dəvətə və səmimi qəbula görə minnətdarlığını bildirib, Çinə işgüzar səfərin Ermənistan üçün böyük əhəmiyyət kəsb etdiyini vurğulayıb.
Baş nazir qeyd edib ki, səfər nəticəsində Ermənistan və Çin arasında münasibətlər strateji tərəfdaşlıq səviyyəsinə yüksəlib və bu, əlaqələrin daha da dərinləşməsi və genişləndirilməsi üçün yeni imkanlar yaradır.
Baş nazirin sözlərinə görə, iki xalqın bir-birinə böyük simpatiyası var ki, bu da hərtərəfli əməkdaşlığın inkişafı üçün möhkəm əsasdır. Tərəflər bir sıra beynəlxalq əhəmiyyətli məsələlər ətrafında fikir mübadiləsi aparıb və yaxın gələcəkdə Ermənistan-Çin əməkdaşlığının həm ikitərəfli səviyyədə, həm də çoxtərəfli platformalarda inkişaf edəcəyinə əminlik ifadə ediblər.
