İyulun 30-da Nyu-Yorkda işgüzar səfərdə olan Ermənistan xarici işlər nazirinin müavini Vahan Kostanyan Yunanıstanın xarici işlər nazirinin müavini İoannis Loverdos ilə görüşüb. Bu barədə Ermənistan Xarici İşlər Nazirliyi məlumat yayıb.
Həmsöhbətlər Ermənistan və Yunanıstan arasında ikitərəfli ənənəvi dostluq münasibətlərində müsbət dinamikanı məmnunluqla qeyd ediblər və ümumi maraq doğuran sahələrdə əməkdaşlığı yeni səviyyəyə qaldırmağa hazır olduqlarını vurğulayıblar. Bu kontekstdə yüksək səviyyəli qarşılıqlı səfərlərin təşkilinin vacibliyi vurğulanıb.
ER xarici işlər nazirinin müavini həmsöhbətə “Ermənistan Respublikasının Avropa İttifaqına qoşulması prosesinin başlanması haqqında” qanunun qəbulundan sonra Ermənistan hökumətinin gördüyü tədbirləri təqdim edib və gələn il Yerevanda keçiriləcək Avropa Siyasi Birliyinin 8-ci sammiti ilə bağlı fikir mübadiləsi aparıb.
Vahan Kostanyan və İoannis Loverdos regional və beynəlxalq gündəlikdəki aktual məsələlərə də toxunublar. Vahan Kostanyan həmsöhbətinə Ermənistanla Azərbaycan arasında münasibətlərin normallaşması prosesində baş verən son hadisələri təqdim edib.
