Biz regionda baş verən hadisələri və inkişafları çox aydın və konkret şəkildə izləyirik. Bunu İranın Ermənistandakı səfiri Mehdi Sobhani keçirdiyi mətbuat konfransında bildirib.
“Biz region ölkələri ilə məsləhətləşir, əlaqə saxlayır, narahatlığımızı bildiririk, qırmızı xətlərimiz aydındır və sübut etdik ki, biz bu qırmızı xətlərdən heç vaxt kənara çıxmayacağıq.
Əlbəttə, biz imkanlar dünyasında yaşayırıq və bəzi ehtimallar narahatedici ola bilər. Amma biz reallıqlarla, faktlarla məşğul oluruq. Biz sayıq qalırıq.
Hesab edirəm ki, Ermənistan hökuməti də prosesləri izləyir. Bizim hakimiyyətlə çox sıx əlaqələrimiz var və Ermənistan hökuməti ilə daim məsləhətləşmələr aparırıq.
Ölkələrin bugünkü davranışı gələcəkdə onlarla münasibətlərimizə də təsir edəcək. Dost və düşmən çətin vəziyyətdə tanınır”, - səfir Sobhani qeyd edib.
İranın Ermənistandakı səfiri Azərbaycanın Syunikdə mümkün təcavüzü ilə bağlı sualı cavablandırarkən deyib ki, onlar təkcə mətbuatda dərc olunan yazılara əsaslanaraq fikir bildirə bilməzlər.
