İyunun 11-də Praqada “Globesec” konfransı çərçivəsində Ermənistan Respublikası xarici işlər nazirinin müavini Vahan Kostanyan Çexiya xarici işlər nazirinin müavini Yan Marian ilə görüşüb. Bu barədə ER Xarici İşlər Nazirliyi məlumat yayıb.
Tərəflər iki ölkə arasında siyasi dialoqun yüksək səviyyədə olmasını məmnunluqla qeyd ediblər. Söhbət zamanı ikitərəfli əməkdaşlığın qarşıdakı gündəliyi ətrafında fikir mübadiləsi aparılıb, iqtisadi sahədə əməkdaşlığın əhəmiyyəti vurğulanıb.
Həmsöhbətlər Ermənistan-Aİ tərəfdaşlığının dərinləşdirilməsi perspektivlərinə toxunub, bu istiqamətdə Çexiyanın dəstəyini vurğulayıblar. Nazir müavini Kostanyan Ermənistan vətəndaşlarına Aİ vizalarının verilməsi prosesində mövcud problemlərin həllinin vacibliyini vurğulayaraq, Ermənistan-Aİ vizasının liberallaşdırılması dialoqunun başlanmasına dəstək verdiyinə görə Çexiyaya təşəkkür edib.
Görüş zamanı Cənubi Qafqazda davam edən münaqişə də müzakirə olunub. Ermənistan Respublikası xarici işlər nazirinin müavini çexiyalı həmkarına Ermənistan-Azərbaycan və Ermənistan-Türkiyə münasibətlərinin normallaşması proseslərində mövcud vəziyyəti təqdim edərək, erməni tərəfinin qonşuları ilə münasibətləri normallaşdırmaq üçün siyasi iradəsini bir daha təsdiqləyib.
