Ermənistanın baş naziri Nikol Paşinyan “Yerevan dialoqu” ikinci beynəlxalq konfransında Ermənistan-Azərbaycan sülh prosesinin hazırkı vəziyyəti ilə bağlı fikirlərini təqdim edib.
"Bildiyiniz kimi, biz Ermənistanla Azərbaycan arasında sülh və dövlətlərarası münasibətlər haqqında Saziş layihəsini razılaşdıra bildik. Biz sənədi yekunlaşdırdıq və layihə üzrə danışıqları başa çatdırdıq və Ermənistan elan etdi və şəxsən mən də bəyan etdim ki, mən sənədi imzalamağa hazıram və bilirsiniz ki, Azərbaycan sazişin imzalanmasını rəsmi olaraq iki məsələ ilə əlaqələndirir: Bunlardan birincisi ATƏT-in Minsk Qrupunun strukturlarının ləğvidir. ATƏT-in Minsk Qrupunun ləğvi bizim üçün məqbuldur və biz irəliləməyə hazırıq, lakin digər tərəfdən əmin olmaq istəyirik ki, biz və Azərbaycan vəziyyəti eyni şəkildə qəbul edirik və Azərbaycan öz ərazisindəki münaqişə vəziyyətini bağlamaq və onu Ermənistan Respublikasının ərazisinə ixrac etmək niyyətində deyil, çünki son illərdə Azərbaycan Ermənistanın suveren ərazisinin 60 faizini “Qərbi Azərbaycan” adlandırmağa başlayıb. Biz dəfələrlə demişik ki, Ermənistan Respublikasının suveren ərazisində “Qərbi Azərbaycan” ola bilməz, onda bizim gələcək üçün ümumi təklifimiz nədir? Biz sülh müqaviləsi imzalamağı və buna paralel olaraq Minsk qrupunun strukturlarının ləğvi ilə bağlı ATƏT-ə müraciət etməyi təklif edirik. Hesab edirəm ki, masada iki sənədin olması və bu sənədlərin eyni vaxtda, eyni anda, eyni yerdə imzalanması konstruktiv təklifdir”, - deyə baş nazir bildirib.
Azərbaycanın qaldırdığı növbəti məsələ ER Konstitusiyasında guya Azərbaycana qarşı ərazi iddialarının yer alması iddiasıdır. "Ümumiyyətlə, aydındır ki, tərəflərin bir-birinə qarşı ərazi iddiası olmamalıdır və bu, sülh üçün çox vacib şərtdir. Gəlin məsələni diqqətlə nəzərdən keçirək və ER Konstitusiyasında Azərbaycana qarşı ərazi iddialarının olub-olmadığını anlayaq. ER Konstitusiyasının nəyi ehtiva etdiyini və nəyi ehtiva etmədiyini rəsmən bəyan edə biləcək yeganə struktur ER Konstitusiya Məhkəməsidir. Ötən il biz Azərbaycanla Ermənistan Respublikası ilə Azərbaycan arasında sərhədin delimitasiyası üzrə iki komissiyanın birgə fəaliyyəti haqqında Əsasnamə imzalaya bildik və bu, Ermənistan Respublikası ilə Azərbaycan arasında imzalanmış tarixdə ilk beynəlxalq ikitərəfli sənəd idi və Ermənistan Respublikasının qanunvericiliyinə uyğun olaraq həmin sənədin Konstitusiyamıza uyğun olub-olmadığını müəyyən etmək üçün Konstitusiya Məhkəməmizə göndərdik.
Ötən ilin sentyabrında Ermənistan Respublikasının Konstitusiya Məhkəməsi birgə fəaliyyət haqqında əsasnaməni araşdırıb və müəyyən edib ki, əsasnamədə Alma-Ata Bəyannaməsi Ermənistan Respublikası ilə Azərbaycan arasında sərhədlərin delimitasiya prosesində əsas prinsip kimi qeyd olunub, ona görə də hər iki Əsasnamə və bu, həm də Alma-Ata Bəyannaməsi deməkdir, Ermənistan Respublikasının Konstitusiyasına tam uyğundur. Bu o deməkdir ki, Ermənistan Respublikasının Konstitusiyasında heç bir qonşuya qarşı ərazi iddiası yoxdur. Ermənistan və Azərbaycanın əraziləri Sovet Ermənistanı və Sovet Azərbaycanının əraziləri ilə eynidir”, - Nikol Paşinyan qeyd edib.
