Sülh müqaviləsi Azərbaycanın malik ola biləcəyi və hazırda malik olduğu bütün narahatlıqları həll edəcək, ona görə də aydındır ki, Azərbaycanın qaldırdığı məsələlərin həlli yolu müqaviləni imzalamamaqdan yox, imzalamaqdan keçir. Bunu Ermənistanın baş naziri Nikol Paşinyan “Yerevan dialoqu” ikinci beynəlxalq forumunda çıxışı zamanı deyib.
"Biz görürük ki, Azərbaycan Konstitusiyasında Ermənistana qarşı bəzi ərazi iddiaları var, lakin biz bu məsələni ayrıca qaldırmamışıq, çünki müqavilənin mətnində məsələyə toxunulacağını hesab etmişik. Bu, bizim yanaşmamızdır", - baş nazir qeyd edib.
“Mənim mövqeyim, çağırışım budur: biz diqqətimizi sülh sazişinin imzalanmasına yönəltməliyik və bir daha təsdiq edirəm ki, mən, hökumətimiz, siyasi komandamız irəliləməyə və regionumuzda davamlı və sabit sülhün olması üçün üzərimizə düşən məsuliyyəti öz üzərimizə götürməyə hazırıq”, - Nikol Paşinyan bildirib.
