Fevralın 6-da Tbilisidəki “Şeraton Metexi” otelinin zalında Ermənistan Respublikası Silahlı Qüvvələrinin yaradılmasının 33-cü ildönümünə həsr olunmuş rəsmi qəbul keçirilib. Bu barədə Ermənistanın Gürcüstandakı səfirliyi məlumat yayıb.
ER səfiri Aşot Smbatyan ordunun formalaşması və qurulması prosesinə toxunaraq qeyd edib ki, yarandığı ilk gündən 1992-ci il yanvarın 28-dən ordu Ermənistanın müstəqilliyinin, suverenliyinin və ərazi bütövlüyünün müfafizəsi funksiyasını öz üzərinə götürüb və yerinə yetirib.
Gürcüstanın müdafiə nazirinin müavini Paata Patiaşvili və Ermənistanın hərbi attaşesi Mesrop Nazaryan da salamlama nitqləri ilə çıxış ediblər. Tədbirdə Gürcüstan Müdafiə Qüvvələri komandanının müavini İrakli Çiçinadze, hüquq-mühafizə orqanlarının yüksək rütbəli nümayəndələri, parlamentarilər, Gürcüstanda akkreditə olunmuş diplomatik nümayəndəliklərin rəhbərləri, hərbi attaşelər, erməni icmasının nümayəndələri iştirak ediblər.
