Xarici aləmdə Ermənistan-Türkiyə münasibətlərinin durumu ilə bağlı anlaşılmazlıq var: bir çox insanlar iki ölkə arasında normal diplomatik münasibətlərin olmamasının səbəbinin tarixi problemlər olduğunu düşünür, lakin bu belə deyil. Bu barədə Ermənistanın Türkiyə ilə normallaşma prosesində xüsusi nümayəndəsi, Ermənistan Parlamentinin sədrinin müavini Ruben Rubinyan “Yerevan dialoqu” konfransında bildirib.
“Ermənistan Türkiyə ilə müntəzəm münasibətlər qurmağa, diplomatik əlaqələr qurmağa, sərhədləri açmağa həmişə hazır olub və hazırdır. Türkiyəli qonşularımızın siyasi iradəsi olsa, sabah da normal münasibətlərimiz ola bilər”, - Rubinyan bildirib.
Regional kommunikasiyalara toxunan Rubinyan qeyd edib ki, indi Cənubi Qafqazı “sülh kəsişməsinə” çevirmək üçün tarixi fürsət yaranıb.
“Kommunikasiyalar geosiyasi rəqabətin girovuna çevrilməməli, mənfi dinamikanın dəyişdirilməsi, sülh və əməkdaşlığın qurulması vasitəsinə çevrilməlidir”, - deyə Parlamentin sədrinin müavini bildirib.
