Noyabrın 24-də ER xarici işlər naziri Ararat Mirzoyan Avropa İttifaqının Ermənistandakı nümayəndəliyinin rəhbəri, səfir Vasilis Maraqosu qəbul edib. Bu barədə ER XİN məlumat yayıb.
Görüş zamanı ER-Aİ tərəfdaşlığının hərtərəfli və iddialı gündəliyinin bir sıra məsələləri müzakirə edilib.
Bütün tərəflərin, o cümlədən Aİ-yə üzv dövlətlərin müxtəlif istiqamətlərdə ER-Aİ qarşılıqlı fəaliyyətinin dərinləşdirilməsi istiqamətində fəal iştiraka və məqsədyönlü, səmərəli addımlar atmağa hazır olması məmnunluqla qeyd olunub. ER xarici işlər naziri və Aİ səfiri demokratik təsisatlar, qanunun aliliyi və insan hüquqlarının müdafiəsi sahələrində, eləcə də digər əsas sahələrdə əldə olunmuş nailiyyətlər və mövcud perspektivlər barədə fikir mübadiləsi aparıblar.
Hər iki tərəf ER-Aİ hərtərəfli və genişləndirilmiş tərəfdaşlıq sazişinin həyata keçirilməsi istiqamətində atılan addımları, eləcə də ER-Aİ iqtisadi və investisiya planının səmərəli həyata keçirilməsini yüksək qiymətləndirib, gözlənilən gələcək dinamika vurğulanıb. Nazir Mirzoyan vurğulayıb ki, ER-nin Aİ ilə tərəfdaşlığı ümumi dəyərlərə əsaslanır və onun daha da zənginləşdirilməsi ER vətəndaşları və cəmiyyəti üçün əhəmiyyətli, nəzərəçarpacaq nəticələrin təmin edilməsinə yönəlib.
İclasda Ermənistan-Azərbaycan münasibətlərinin normallaşdırılması prosesindəki son hadisələrə və regionda uzunmüddətli sabitliyin yaradılmasına baxışa, onun həyata keçirilməsinə yönəlmiş regional proqramlara, o cümlədən Aİ-nin iştirakı və dəstəyinə toxunulub.
