Այսօր մեր ոլորտներում 4 փաստաթուղթ ստարագրվեց: Երեքը ստորագրվեց մեր ոլորտների կառույցների միջև՝ կինոյի ոլորտում, գրադարանների միջև համագործակցության, ինչպես նաև թանգարանային համագործակցության նախագծեր ենք դրանցով պատրաստվում իրականացնել: Այս մասին «Լուրերի» թղթակցի հետ զրույցում ասաց ԿԳՄՍ նախարար Ժաննա Անդրեասյանը՝ անդրադառնալով Իրանի հանքարդյունաբերության նախարարի հետ ստորագրված փաստաթղթերին:
«Ես նաև ստորագրեցի հուշագիր, որը հնարավորություն է ընձեռում ավելի ակտիվ աշխատել արհեստագործական կրթության ոլորտում՝ մասնավորապես քոլեջների կրթության զարգացման նոր նախաձեռնություններ դրսևորել:
Բազմաթիվ գաղափարներ ունենք: Իրանում արհեստագործակցական կրթության որոշ ուղղություններ շատ զարգացած են, կարծում ենք՝ կարող ենք որոշ ուղղություններով թե՛ վերապատրաստման, թե՛ մեր քոլեջների բազայի հիման վրա համագործակցության ծրագրեր իրականացնել»,- ասաց Անդրեասյանը:
Ավելի վաղ տեղեկացրել էինք, որ «Իրանի Իսլամական Հանրապետության կոոպերացիայի, աշխատանքի և սոցիալական բարեկեցության նախարարության և Հայաստանի Հանրապետության կրթության, գիտության, մշակույթի և սպորտի նախարարության միջև ստորագրվել է մասնագիտական կրթության և ուսուցման (ՄԿՈՒ) ոլորտում 2025-2029 թվականների համագործակցության մասին» փոխըմբռնման հուշագիր: Հայկական կողմից այն ստորագրեց ՀՀ ԿԳՄՍ նախարար Ժաննա Անդրեասյանը, իրանական կողմից՝ ԻԻՀ հանքարդյունաբերության նախարար Սեյեդ Մոհամմադ Աթաբաքը:
