Ermənistan və Litva bu gündən etibarən strateji tərəfdaşlardır. Sənəd Yerevanda xarici işlər nazirləri Ararat Mirzoyan və Kestutis Budris tərəfindən imzalanıb. Mirzoyanın sözlərinə görə, bu format daha əhatəli əməkdaşlıq üçün fürsət yaradacaq.
“Həmkarım və dostum Kestutis Budrisi Ermənistana salamlamaqdan və onunla münasibətlərimizi yeni strateji tərəfdaşlıq səviyyəsinə qaldırmaqdan məmnunam”, - deyə Mirzoyan bildirib.
Litva xarici işlər naziri Kestutis Budris Yerevandan göndərdiyi video mesajda Ermənistan və Litva arasında siyasi və iqtisadi əməkdaşlığı genişləndirmək və Ermənistanın Avropaya inteqrasiya yolunu dəstəkləmək məqsədi daşıyan strateji tərəfdaşlıq bəyannaməsinin imzalandığını elan edib.
“Yerevandan salamlar. Bu gün həmkarım, xarici işlər naziri Ararat Mirzoyanla diplomatik münasibətlərin qurulmasının 35-ci ildönümünü qeyd edirik. Bu gün biz həmçinin siyasi və iqtisadi əməkdaşlıq üçün geniş çərçivəni müəyyən edən, eləcə də Ermənistanın Aİ ilə əlaqələrini və onun Avropaya inteqrasiya yolunu möhkəmləndirməsində dəstəyimizi vurğulayan strateji tərəfdaşlıq bəyannaməsini imzaladıq. Hər şey yaxşı olacaq", - deyə o bildirib.
