ABŞ və Hindistan ticarət razılaşmasına yaxınlaşaraq, tarifləri aşağı salacaq, enerji əlaqələrini yenidən quracaq və iqtisadi əməkdaşlığı dərinləşdirəcək müvəqqəti sənəd yayımladılar.
Bundan əlavə, ABŞ prezidenti Donald Tramp Yeni Dehlinin Rusiya neftini satın alması ilə əlaqədar Hindistan mallarına tətbiq edilən əlavə 25 faizlik rüsumun qaldırılması barədə sərəncam imzaladı. Qərar 7 fevralda qüvvəyə minəcək.
Trampın sözlərinə görə, qərar Hindistanın milli təhlükəsizlik, xarici siyasət və iqtisadi məsələlərdə ABŞ ilə uyğunlaşmaq üçün əhəmiyyətli addımlar atması ilə bağlıdır.
ABŞ prezidentinin sözlərinə görə, Hindistan həmçinin Rusiyadan neft idxalını dayandırmaq öhdəliyini götürüb və ABŞ-dan enerji alacaq.
Bundan əlavə, fərmana görə, ABŞ Ticarət Nazirliyi Hindistanın Rusiyadan birbaşa və ya dolayı yolla neft idxalını bərpa etdiyini aşkar edərsə, 25 faizlik rüsum bərpa edilə bilər.
Daha əvvəl ABŞ prezidenti və Hindistanın Baş naziri telefon danışığı zamanı razılığa gəliblər. Razılığa əsasən, Hindistandan ABŞ-a idxal edilən mallara gömrük rüsumları 18 faizə endiriləcək və Nyu-Dehli Vaşinqtondan külli miqdarda mal alacaq.
