Avropa İttifaqı Şurası Ermənistana 20 milyon avroluq dəstək vermək qərarına gəlib. Şuranın bəyanatına görə, dəstək böhran və fövqəladə hallarda mülki şəxslərin qorunmasına diqqət yetirərək Ermənistan Silahlı Qüvvələrinin logistika imkanlarını gücləndirməyi hədəfləyir.
Bəyanatda deyilir: "Bu, həmçinin Ermənistanın dayanıqlığını artıracaq və gələcəkdə Aİ-nin rəhbərlik etdiyi beynəlxalq missiyalarda iştirakı mümkün olduqda silahlı qüvvələrinin qarşılıqlı fəaliyyətini sürətləndirəcək".
O, həmçinin Aİ-nin Aİ-Ermənistan tərəfdaşlığı üçün yeni strateji gündəliyə əsaslanaraq Ermənistanla hərtərəfli siyasi və iqtisadi tərəfdaşlığını gücləndirmək öhdəliyini vurğulayır.
Aİ-nin Xarici İşlər və Təhlükəsizlik Siyasəti üzrə Ali Nümayəndəsi Kaya Kallas qeyd edib: "Bu Avropa Sülh Fondu yardımı Aİ ilə Ermənistan arasında təhlükəsizlik və müdafiə sahəsində daha sıx əməkdaşlığa doğru daha bir addımdır. Bu tədbirlə Aİ bütün regionun sabitliyinə, sülhünə və təhlükəsizliyinə töhfə verən Ermənistanın dayanıqlığını dəstəkləməyə davam etmək öhdəliyini nümayiş etdirir”.
Xatırladaq ki, Ermənistan 2025-ci ildə fonddan yardım üçün müraciət etmişdi, lakin Macarıstan bunu bloklamışdı. Ölkənin xarici işlər naziri bildirmişdi ki, Budapeşt, Azərbaycan da eyni miqdarda yardım aldığı təqdirdə, Ermənistana yardım göstərməyə qarşı deyil. Danışıqlardan sonra Macarıstan mövqeyini dəyişdi. Qərara cavab olaraq Ermənistan Xarici İşlər Nazirliyi qeyd etdi ki, bu, əslində dekabr ayında əldə edilən siyasi razılaşmanın, konsensusun rəsmi nəticəsidir.
