Ermənistan səfiri Narek Mkrtçyan ABŞ-ın Yuta ştatına işgüzar səfəri çərçivəsində Yuta ştatındakı Dünya Ticarət Mərkəzini, eləcə də ştatın ən böyük sənaye şirkəti DoTerra-nın qərargahını ziyarət edib. Bu barədə səfirlik məlumat verir.
Dünya Ticarət Mərkəzində səfir Mkrtçyan mərkəzin prezidenti və baş direktoru Conatan Fridmanla görüşüb. Görüşdə Sterlinq Fondunun icraçı direktoru Mayls Hansen və sahibkar, professor Pol Ahlstrom da iştirak edib.
Görüşdə səfir Ermənistan və ABŞ arasında son iqtisadi və siyasi inkişafları təqdim edib. C. Fridman vurğulayıb ki, Yuta texnoloji sektorda əməkdaşlıq üçün ən yaxşı ştatlardan biridir. Görüşün sonunda tərəflər əməkdaşlığa yönəlmiş konkret addımların həyata keçirilməsinə sadiq olduqlarını vurğulayıblar.
DoTerra-nın qərargahında səfir təsisçi prezident və baş direktor Devid Sterlinq ilə görüşüb. Əməkdaşlığın mümkün sahələri və istiqamətləri müzakirə olunub. Səfir qərargahı gəzib və şirkətin fəaliyyəti ilə tanış olub. Görüşün sonunda səfir D. Sterlinq tərəfindən təsis edilmiş Sterlinq Fonduna Ermənistanda həyata keçirilən 15-dən çox proqrama görə minnətdarlığını bildirib.
