Dekabrın 16-da Lüksemburqda ER xarici işlər naziri Ararat Mirzoyan Lüksemburq Deputatlar Palatasının prezidenti Klod Visler ilə görüşüb. Görüşdə Xarici Əlaqələr Komitəsinin sədri və üzvləri də iştirak ediblər. Bu barədə Xarici İşlər Nazirliyi məlumat verib.
Həmsöhbətlər məmnuniyyətlə qeyd ediblər ki, birgə ardıcıl iş nəticəsində ikitərəfli münasibətlər strateji tərəfdaşlıq səviyyəsinə qaldırılıb. Bu kontekstdə, eyni gündə imzalanmış, əməkdaşlığın prioritetlərini müəyyən edən və qanunvericilik orqanları arasında əməkdaşlığın vacibliyini vurğulayan Birgə Bəyannaməyə toxunulub.
Nazir Mirzoyan Lüksemburq Parlamenti tərəfindən Ermənistana göstərilən davamlı dəstəyə görə minnətdarlığını bildirib.
Ararat Mirzoyan və Lüksemburq Parlamentinin sədri həmçinin ER-Aİ strateji gündəliyinin bir hissəsi olan proqramları həyata keçirməyə hazır olduqlarını vurğulayıblar.
Görüşdə regional məsələlər ətraflı müzakirə olunub. Nazir Mirzoyan qonşularla münasibətlərin normallaşdırılması proseslərini təqdim edib. Regional əlaqələrin inkişafı üçün yaradılan imkanlar barədə fikir mübadiləsi aparılıb. Həmçinin humanitar məsələlərin həllinə də toxunulub.
