Sentyabrın 16-da Parisdə Ermənistan Respublikası xarici işlər nazirinin müavini Vahan Kostanyan və Fransanın Avropa və Xarici İşlər Nazirliyinin Kontinental Avropa Direktorluğunun rəhbəri Bris Rokefo başda olmaqla Ermənistan və Fransa Xİ nazirlikləri arasında siyasi məsləhətləşmələr keçirilib.
XİN-dən verilən məlumata görə, məsləhətləşmələrdə iki ölkə arasında iqtisadiyyat, infrastruktur, müdafiə və mədəniyyət sahələrində yaradılmış əməkdaşlıq proqramları, eləcə də onların inkişafı və genişləndirilməsi perspektivləri müzakirə olunub.
Beynəlxalq təşkilatlarda və digər çoxtərəfli platformalarda mövcud əməkdaşlıq məsələləri də müzakirə edilib. Bu kontekstdə bir-birini daim dəstəkləməyin, eləcə də iki ölkə üçün xüsusi əhəmiyyət kəsb edən və həssas olan məsələlərdə yanaşmaların yaxınlaşması üçün əlavə səylərin göstərilməsinin zəruriliyi vurğulanıb.
ER-Aİ tərəfdaşlığı gündəliyi ilə bağlı məsələlərə toxunulub. Bu kontekstdə Fransanın həmin gündəliyin genişlənməsində və irəliləməsində müsbət rolu xüsusi vurğulanıb.
Ermənistan və Fransa arasında strateji tərəfdaşlığın yaradılması istiqamətində hər iki tərəfin atdığı addımlar ətrafında da ətraflı müzakirələr aparılıb.
Tərəflər gələn il Ermənistanda keçiriləcək iki böyük beynəlxalq tədbirin: Avropa Siyasi Birliyinin Sammiti və Bioloji Müxtəliflik üzrə Konvensiya Tərəflərinin 17-ci Konfransının (COP17) keçirilməsi kontekstində əməkdaşlıq imkanlarını müzakirə ediblər.
Ən diqqətəlayiq regional və beynəlxalq mövzular ətrafında fikir mübadiləsi aparılıb. Ermənistan və Azərbaycan arasında münasibətlərin normallaşması prosesi çərçivəsində Vaşinqtonda əldə olunmuş razılaşmalara, eləcə də Ermənistan-Türkiyə arasında normallaşma prosesinə toxunulub.
