İranın xarici işlər naziri Abbas Əraqçi, Avropa üçlüyünün - Fransa, Böyük Britaniya və Almaniyanın xarici işlər nazirləri və Avropa diplomatiyasının rəhbəri Kaya Kallas arasında telefon danışığı olub. Tərəflər gələn həftə İranın nüvə proqramı ilə bağlı danışıqları bərpa etmək barədə razılığa gəliblər. Müzakirələr avqustun 26-da xarici işlər nazirlərinin müavinləri səviyyəsində baş tutacaq.
Əraqçi qeyd edib ki, İran öz hüquqlarını təmin edən diplomatik həll yoluna açıqdır. Üç Avropa ölkəsi daha əvvəl bəyan etmişdilər ki, Tehran danışıqlar masasına qayıtmasa, BMT-nin İrana qarşı sanksiyalarını bərpa edə bilərlər.
Əraqçı telefon danışığında Avropa ölkələrinin sanksiyaların bərpası mexanizmini işə salmaq üçün hüquqi və mənəvi əsaslara malik olmadığını və belə bir addımın nəticələrinin olacağını vurğulayıb.
İran Xarici İşlər Nazirliyinin məlumatına görə, 2231 saylı qətnamənin müddətinin uzadılması təklifindən danışan Əraqçi belə bir qərarın ilk növbədə BMT Təhlükəsizlik Şurası tərəfindən qəbul edilməli olduğuna diqqət çəkib və əlavə edib ki, İslam Respublikası məsələ ilə bağlı prinsipial mövqeyinə baxmayaraq, həmin prosesə müdaxilə etməyəcək.
