Ermənistan Parlamentinin sədri Alen Simonyan Ermənistanın Müstəqillik Bəyannaməsinin qəbul edilməsinin 35-ci ildönümü münasibətilə təbrik məktubu göndərib.
Mesajda deyilir:
“Əziz həmvətənlər, 1990-cı il avqustun 23-də Ermənistan SSR Ali Soveti Ermənistanın Müstəqillik Bəyannaməsini qəbul etdi.Həmin gün erməni xalqı azad yaşamaq və öz müqəddəratını müstəqil şəkildə təyin etmək hüququnu bir daha təsdiq etdi.
Müstəqilliyə gedən yol asan deyildi. Lakin son hadisələr dövlətimiz üçün yeni tarixi imkanlar açdı, Ermənistan Respublikasının müstəqilliyini və suverenliyini daha da möhkəmləndirdi.
Bu gün biz müstəqilliyimizin, suverenliyimizin dəyərini hər zamankindən daha çox dərk edirik. Məhz sülh müstəqilliyimizi möhkəmləndirir, ölkəmizi inkişaf etdirməyə, vətəndaşlarımızın ləyaqətli həyatını təmin etməyə imkan verir. İndi biz təkcə müstəqil deyilik, həm də sülhsevərik, təbii ki, həm də xalqımızın müdrik qərarları sayəsində.
Əziz həmvətənlər, sizi Ermənistanın Müstəqillik Bəyannaməsinin qəbul edilməsinin 35-ci ildönümü münasibətilə təbrik edirəm.
Vətəndaşlarımızın firavan və təhlükəsiz həyatını təmin edən müstəqilliyimiz, əmin-amanlığımız əbədi olsun”.
