Rusiya prezidenti ilə İsrailin baş naziri arasında telefon danışığı olub. Kremlin məlumatına görə, Vladimir Putin və Benyamin Netanyahu Yaxın Şərqdəki gərginliyi müzakirə ediblər.
“Rusiya tərəfi regionda mövcud problemlərin və münaqişələrin müstəsna olaraq sülh yolu ilə həllinin tərəfdarı olduğu sarsılmaz mövqeyini bir daha təsdiqlədi”, - press-relizdə deyilir.
Vladimir Putin Suriyanın birliyinin, suverenliyinin və ərazi bütövlüyünün qorunmasının, ərəb respublikasının daxili siyasi sabitliyinin möhkəmləndirilməsinin vacibliyini vurğulayıb. Kreml liderinin sözlərinə görə, ölkədəki etnik və dini qrupların hüquq və maraqları nəzərə alınmalıdır.
"İran-İsrail münaqişəsinin son günlər gərginləşməsi fonunda Rusiya tərəfi nüvə proqramı üzrə danışıqlar prosesinə töhfə verməyə hazır olduğunu bildirib", - Moskva əlavə edib.
İki ölkə liderləri beynəlxalq və ikitərəfli gündəlikdəki məsələlər üzrə dialoqun davam etdirilməsi barədə razılığa gəliblər.
