Ədliyyə nazirinin müavini Anna Karapetyan Brüsseldə ER-Aİ Tərəfdaşlıq Komitəsinin altıncı sessiyasında iştirak edib. Bu barədə Ermənistanın Ədliyyə Nazirliyi məlumat yayıb.
Sessiya zamanı tərəflər ötən ildə qarşılıqlı prioritet hesab olunan sahələrdə əldə olunmuş nailiyyətləri, mövcud problemlər, eləcə də əməkdaşlığın dərinləşdirilməsinə yönəlmiş yeni təşəbbüsləri müzakirə ediblər.
Ermənistan-Avropa İttifaqı Hərtərəfli və Genişləndirilmiş Tərəfdaşlıq Sazişinin icrası və bu məqsədlə yeni yol xəritəsinin hazırlanması, məhkəmə-hüquq islahatları, korrupsiyaya qarşı mübarizə, insan hüquqları, fərdi məlumatların qorunması, hüquq bərabərliyinin təmin edilməsi sahələrində Ermənistanın həyata keçirdiyi islahatlar, Avropa İttifaqında cari proseslərlə bağlı məsələlər müzakirə edilib.
Anna Karapetyan şəxsi məlumatların qorunması üçün atılan addımlardan danışıb. Nazir müavini yerlərdə yeni muxtar qurumun formalaşdırılması konsepsiyasını təqdim edib. Bu kontekstdə o, Aİ tərəfdaşlarının dəstəyini yüksək qiymətləndirib, həmçinin Aİ ilə viza rejiminin liberallaşdırılması prosesi kontekstində islahatların əsas mahiyyətini qeyd edib.
Nazir müavini ayrı-seçkiliyə qarşı mübarizə sahəsində strateji sənədin mövcudluğunun vacibliyinə də toxunaraq, Ədliyyə Nazirliyinin təşəbbüsü ilə artıq strategiyanın ilkin layihəsinin hazırlandığını və yaxın vaxtlarda ictimaiyyətin müzakirəsinə çıxarılacağını vurğulayıb.
Tərəflər həmçinin Aİ-nin ədliyyə sektoruna dəstəyinin çərçivəsini və birgə həyata keçirilən proqramların davamlılığını müzakirə ediblər.
İclasın sonunda müvafiq istiqamətlər üzrə qarşıda duran addımları əks etdirən sessiyanın operativ yekunları qəbul edilib.
