İsrail ardıcıl dördüncü gecədir ki, İranın strateji hədəflərinə hücum edir. Bazar ertəsi səhər tezdən, iyunun 16-da İsrail Müdafiə Qüvvələri İranın mərkəzində yerləşən “yer-yer” raket anbarlarına, eləcə də Tehranda İslam İnqilabı Keşikçiləri Korpusunun bir neçə komanda mərkəzinə zərbələr endirdiyini bildirib. Ötən gecə İsrail bildirib ki, İranın qərbində “yer-yer” tipli raketlər saxladığı güman edilən onlarla hədəfi vurub. Şimal-şərqdəki Məşhəd şəhərinin hava limanı da hədəfə alınıb.
İran da öz növbəsində iyunun 16-da səhər saatlarında yeni raket hücumlarına başlayıb.İsrail təcili yardım xidmətinin məlumatına görə, İsrailin mərkəzinə endirilən zərbələr nəticəsində 4 nəfər ölüb, 87 nəfər yaralanıb. AFP Təl-Əvivdə yaşayış binalarının və sahilyanı Hayfa şəhərinin kənarında baş verən yanğınların görüntülərini dərc edib. Yerusəlimdə güclü partlayış səsləri eşidilib. İnqilab Keşikçiləri Korpusu İsrailin hədəflərinə “daha dağıdıcı” zərbələr endirməklə hədələyib.
