Rusiya prezidentinin köməkçisi və Kiyevlə danışıqlarda Rusiya nümayəndə heyətinin rəhbəri Vladimir Medinski bəyan edib ki, Ukraynada cəbhə xəttində hərbi əməliyyatların dayandırılması Dağlıq Qarabağdakı kimi vəziyyət yarada bilər.
"Əgər biz indi sülhə razı olmasaq, sadəcə olaraq hansısa atəşkəs əldə etsək, o zaman bu region nəhəng Qarabağa çevriləcək. Bir müddət sonra Ukrayna NATO ilə birlikdə onu fəth etməyə çalışacaq və bu, planetin sonu olacaq, bu, nüvə müharibəsi olacaq. Biz istəmirik ki, yeni tanınmamış Qarabağ yaransın, bu da nüvə müharibəsinə çevrilsin". O, çıxışında Dağlıq Qarabağı Ermənistanla Azərbaycan arasında mübahisəli ərazi adlandırıb.
Onun sözlərinə görə, Rusiya yeni ərazilərin tanınması ilə tam sülh bağlamaq istəyir.
Azərbaycan Xarici İşlər Nazirliyi Medinskinin bəyanatına cavab verib və bunun reallığı təhrif etdiyini qeyd edib. Azərbaycan Xarici İşlər Nazirliyi xatırladıb ki, Rusiya Dağlıq Qarabağı Azərbaycanın bir hissəsi kimi tanıyıb və tanımaqda davam edir.
