Rusiyanın xarici işlər naziri Sergey Lavrov Moskvada keçirilən konfransda Ermənistana səfərinə toxunub.
“Mən Ermənistanda idim. Ermənistan tərəfi öz ərazisini və logistik imkanlarını ümumi kontinental proseslərə inteqrasiya etməyə çalışaraq “Sülhün kəsişməsi” təşəbbüsünü hazırlayıb. Əgər bu barədə danışsaq, o zaman biz bütün infrastruktur layihələrinin inkişafının tərəfdarıyıq ki, çinli dostlarımızın dediyi kimi, “minlərlə, milyonlarla gül açılsın”. Amma praktikada “Sülhün kəsişməsi”ni həyata keçirmək üçün Ermənistanla Azərbaycan arasında sülh müqaviləsi imzalanmalıdır. Bu işdə sizə səmimi qəlbdən uğurlar arzulayırıq. Sözün əsl mənasında dünən biz bunu Ermənistan Respublikasının baş naziri Nikol Paşinyan və Ermənistan Respublikasının prezidenti Vahaqn Xaçaturyanla müzakirə etdik. Aydındır ki, razılaşma Ermənistan, Rusiya və Azərbaycan arasında üçtərəfli sammitlər sayəsində mümkün olub. Tərəflər bunda maraqlı olarsa, bundan sonra da yardım göstərməyə hazırıq. Təbii ki, Ermənistanla Türkiyə arasında münasibətlərin normallaşması da zəruridir. Münaqişələrin aradan qaldırılması və nəqliyyat və iqtisadi əlaqələrdə yaranan məhdudiyyətlərin aradan qaldırılması bu regionun və bütün qitənin rəqabət qabiliyyətini əhəmiyyətli dərəcədə artıracaq", - o qeyd edib.
