Türkiyə xarici işlər naziri bildirib ki, Türkiyə və İsrail Suriyada münaqişənin qarşısını almaq üçün birbaşa danışıqlar aparır. O, tərəflər arasında anlaşılmazlığın qarşısının alınmasının vacib olduğunu bildirib.
Hakan Fidan həmçinin qeyd edib ki, Türkiyə ilə İsrail arasında əsas məsələlər Qəzza, İordan çayının qərb sahili və Məscidül-Əqsadır.
“Bizim heç kimlə münaqişəyə girmək niyyətimiz yoxdur, lakin Suriyada Türkiyə üçün təhlükə yaradan heç bir hərəkətə, iğtişaşlara və təxribata biganə qalmayacağıq. İsrailin strategiyası Suriyanın yeni hökumətinə heç nə buraxmamaqdır. Dekabrın 8-dən İsrail nizami ordulara məxsus bütün infrastruktura müntəzəm qurudan və havadan zərbələr endirir”, - deyə Fidan bildirib.
Onun sözlərinə görə, Suriya Türkiyə ilə hərbi müqavilə imzalasa, Ankara dəstək verməyə hazırdır. ️ ️
Türkiyənin xarici işlər naziri ABŞ-la münasibətlərə də toxunub və qeyd edib ki, Ankara “Amerikanın düşmənlərinə sanksiya vasitəsilə mübarizə haqqında” qanunun tətbiq etdiyi sanksiyaları ləğv etməyə çalışır. Fidanın fikrincə, Türkiyə və ABŞ kimi müttəfiqlər arasında heç bir sanksiya olmamalıdır.
Diplomat əlavə edib ki, Ankara Ərdoğanla Tramp arasında görüşə hazırlaşır.
