ABŞ prezidenti Donald Tramp Ukrayna prezidenti Vladimir Zelenskini Vaşinqton və Kiyev arasında minerallar sazişindən çıxmaq niyyətində olduğu üçün ittiham edib. "O, nadir minerallarla bağlı sazişdən çıxmağa çalışır və əgər çıxsa, böyük, çox böyük problemləri olacaq" - deyə Reuters agentliyi Trampa istinadən xəbər verir.
Tramp həmçinin əlavə edib ki, Zelenski “NATO üzvü olmaq istəyir, lakin bu, heç vaxt baş tutmayacaq. O, bunu başa düşür."
Dünən Bloomberg agentliyi bildirib ki, Kiyev sazişin bir hissəsi kimi ABŞ-dan daha çox investisiya almaq istəyir və Trampın təklif etdiyi iqtisadi sazişə Amerika investisiyalarının artırılması öhdəliyini daxil etmək üçün dəyişikliklər edilməsini istəyəcək.
Bloomberg qeyd edir ki, təklif layihəsi Vaşinqtonun Ukraynanın infrastrukturuna və minerallara bütün əsas investisiyalar üzərində heç bir vaxt məhdudiyyəti olmadan nəzarəti nəzərdə tutur. Kiyev narahatdır ki, sazişin şərtləri ölkənin Aİ-yə daxil olma prosesinə xələl gətirə və müharibənin əvvəlindən ABŞ-ın göstərdiyi bütün hərbi və iqtisadi yardımları geri qaytarmağı tələb edə bilər.
Həmçinin qeyd olunur ki, Ukrayna rəsmiləri amerikalı həmkarları ilə söhbət zamanı təklif olunan sənədlə bağlı narahatlıqlarını bildiriblər. Amerika tərəfi xüsusilə Ukraynanın Avropa Birliyinə mümkün üzvlüyü ilə bağlı etiraz etməyib. Bloomberg anonim həmsöhbətin mövqeyini bildirir: "Bu, Vaşinqtonun dəyişiklikləri müzakirə etməyə açıq ola biləcəyini göstərir".
