Ermənistan Respublikasının ərazi idarəetmə və infrastruktur nazirinin müavini Armen Simonyan Ermənistan Respublikasının İran İslam Respublikasındakı fövqəladə və səlahiyyətli səfiri Qriqor Hakobyan ilə birlikdə Tehranda İran İslam Respublikasının yol və şəhərsalma naziri Fərzanə Sadiq və nazir müavini Əkbəri Rza ilə görüşüb. Bu barədə Ərazi İdarəetmə və İnfrastruktur Nazirliyi məlumat yayıb.
Tərəflər iki ölkə arasında nəqliyyat sahəsində əməkdaşlığı alqışlayıblar. Görüşlər zamanı hər iki ölkədə yük avtomobillərindən tutulan yol vergilərinin qarşılıqlı azaldılması və/və ya ləğv edilməsi məsələləri müzakirə olunub.
Tərəflər yol vergiləri üzrə ikitərəfli imtiyazların verilməsinin mümkün variantlarını müzakirə etmək üçün yaxın gələcəkdə peşəkar qrupların görüşünü təşkil etmək barədə razılığa gəliblər.
Həmçinin avtomobil yolu ilə yükdaşımaların rəqəmsallaşdırılması, xüsusilə də e-CMR-nin istifadəsi ilə bağlı məsələlər müzakirə olunub.
Yük daşımalarının rəqəmsallaşdırılması sahəsində əlaqələrin dərinləşdirilməsinə dair razılıq əldə olunub.
