Dekabrın 17-də Yerevanda Ermənistan Respublikası ilə Yunanıstan Respublikası arasında iqtisadi, sənaye və elmi-texniki əməkdaşlıq üzrə hökumətlərarası komissiyanın 6-cı iclası keçirilib. Hökumətlərarası komissiyanın həmsədrləri ER iqtisadiyyat naziri Gevorq Papoyan və Yunanıstan xarici işlər nazirinin müavini Konstantinos Franqoyanis olub. Bu barədə Ermənistanın İqtisadiyyat Nazirliyi məlumat yayıb.
İqtisadiyyat və investisiya, ticarət, sənaye, kiçik və orta sahibkarlığın inkişafı, kənd təsərrüfatı, ətraf mühit və iqlim dəyişikliyi, səhiyyə, rəqəmsallaşma, yeni texnologiyalar, yüksək texnologiyalar və elm, keyfiyyətli infrastruktur, nəqliyyat, turizm və s. sahələrdə əməkdaşlıqla bağlı bir sıra məsələlər müzakirə edilib.
“Ermənistan Respublikası ilə Yunanıstan Respublikası arasında hökumətlərarası komissiyanın iclasları mühüm platformaya çevrilib, burada mövcud məsələlərin müzakirəsi və əməkdaşlığın yeni sahələrinin müəyyənləşdirilməsi, əməkdaşlığın potensialının üzə çıxarılmasına yönəlmiş effektiv mexanizmlərin işlənib hazırlanması imkanı yaradılıb. Bu kontekstdə biz istərdik ki, Yunanıstan kapitalının Ermənistanda təmsilçiliyi genişlənsin ki, bu da bizim iki ölkənin iqtisadiyyatı üçün qarşılıqlı faydalı olacaq”, - Gevorq Papoyan bildirib.
Sessiyanın yekunu olaraq hökumətlərarası komissiyanın iclasının protokolu imzalanıb.
