Ermənistana rəsmi səfərə gələn Polşa prezidenti Anjey Dudanın başçılıq etdiyi nümayəndə heyəti noyabrın 26-da ER xarici işlər nazirinin müavini Paruyr Hovhannisyan, Yerevan merinin müavini Armen Pambukçyan və ER-nin Polşadakı fövqəladə və səlahiyyətli səfiri Aleksandr Arzumanyanın müşayiəti ilə Erməni Soyqırımı Memorialını ziyarət edib. Bu barədə Erməni Soyqırımı Muzey-İnstitutu məlumat yayıb.
Polşa Prezidenti Erməni Soyqırımı qurbanlarının xatirəsinə ucaldılmış abidənin önünə əklil qoyub, sonra qonaqlar əbədi məşəl önünə gül dəstələri qoyub, Erməni Soyqırımının günahsız qurbanlarının xatirəsini bir dəqiqəlik sükutla yad ediblər.
Anjey Duda da Xatirə Parkında olub və Erməni Soyqırımı qurbanlarının xatirəsinə küknar əkib.
