Oktyabrın 31-də ER xarici işlər nazirinin müavini Paruyr Hovhannisyan Yerevanda Ledy Koksun reabilitasiya mərkəzinin yenidən açılış mərasimində iştirak etmək üçün Ermənistana gələn Böyük Britaniyanın Lordlar Palatasının üzvü Baronessa Karolin Koksu ilə görüşüb.
Bu barədə ER XİN məlumat yayıb.
“Paruyr Hovhannisyan baronessaya Ermənistana və erməni xalqına uzun illər dostluğuna və dəstəyə görə minnətdarlığını bildirib. Öz növbəsində baronessa Ermənistan hökumətinin Dağlıq Qarabağdan məcburi köçkün düşmüş ermənilərin ehtiyaclarının həlli istiqamətində atdığı hərtərəfli addımları yüksək qiymətləndirib.
Tərəflər humanitar sahədə birgə səylərin imkanlarını müzakirə edib və Ermənistan-Britaniya gündəmindəki məsələlərə toxunublar.
Görüş zamanı nazir müavini Paruyr Hovhannisyan regional, Ermənistan-Avropa İttifaqı tərəfdaşlığı gündəliyini, eləcə də Ermənistan və Azərbaycan arasında münasibətlərin normallaşması prosesində son hadisələri təqdim edib”.
